العصفورة قالت لى...

جات العصفورة حزينة و فى وشها لطشة سكينة و الدم منها بيشر لحد ما طرطش علينا
سألتها: مالك يا عصفورتى الحنينة؟؟
ردت و قالت: اللى اتعمل فى ام درمان يستحق انه يتعمل فينا
قلتلها: ايه حصل ايه و ايه اللى جرى؟؟
قالت: أحكى من الاول و لا اجيبلك من ورا
قلت: من الاول و اوعى فى الكلام تحورى
قالت: هتكلم على التعصب الكروى
اللى بيحصل فى الكورة والخناقات و الشبورة. و التشجيع بدون ريادة ده عمره ما كان رياضة
ده ممكن يكون حرب و استعمار أو حتى شغل فى ورشة نجار ومن اللى انا شفته اقول كتر خير الحمار
الضرب بالحجارة و المطاوى والشتايم ده ولا قعدة القهاوى اهلاوى بيسب زملكاوى و زملكاوى بيرزل على أهلاوى و اسماعيلاوى بيحقد على مصرواوى و...و ....و....بالذمة مش ده جنان. بالذمة مش نستحق اللى حصلنا فى أم درمان؟ و قال ايه بيقولوا الغلط ع السودان.
ولا لما يكون مباراة ذهاب الضيف بيحس انه هيلعب مع ذئاب واقرب مثل بيتهيألى لما لعب الاسماعيلى مع الاهلى شفت الاهلى لما كان ضيف الاسماعيلى كان زى رفيق حليش ولا الجمهور ابو دم خفيف شتايم و عصبية ما تتحكيش بقى هو ده اكرام الضيف ولا مش مهتمين يا اخوانا ده احنا كلنا مصريين.
ولا الحكام انا معاك يتثير الجنان بس اللاعب الغلبان ولا الجمهور الزهقان ما يمسكش أعصابه ليه يا اخوانا شوية ارادة دى مهما كان اسمها رياضة مش حرب و انتفاضة.
ولا النقاد الصحفيين اللى هم المفروض قدوة المصريين على الاعلام مسيطريين و طبعا بيهدوا النفوس ماهو كله بياخد فلوس و قصدى بتهدية النفوس مش المعنى الصحيح ده الواحد منهم بيقول تصريح يخلى الشعب النايم يصيح و تبدأمن تانى العصبية بتاع الاهلى مستحلف للزملكاوية و العكس بيحصل بس ده مثل انا بقولوا لحد يفتكر انا بقصد نادى بعينه بالذمة انت مش زهقان. بالذمة مش ليهم حق اللى عملوه فينا فى ام درمان؟
رايك ايه يا شاعر الارادة. بالذمة هية دى الرياضة؟
ولا انتم يا أعضاء النجوم بالذمة ينفع كده الهجوم؟
رديت عليها بعد شهيق: عصفورتى لا تعليق***
بس مستنى رأى النجوم و بقولهم ينفع الحال ده يدوم
ولا علشان مفهوم عن الرياضة غلطان ينفع يتقال نستاهل اللى اتعمل فينا فى أم درمان
أمال فين وحدة الاوطان؟؟؟؟؟
بقلم/ نسر الشرق
انتظرونى فى العصفورة السادسة

موضوع: العصفورة الاولى السبت مارس 27, 2010 6:58 am

يسعدنى ان ابدأ اولى كتباتى من موضوع بعنوان العصفورة قالت لى و ده بيعرض الاحداث الجارية فى مجتمعنا و بعرضها بطريقة عامية شوية و هزلية و يا ريت يعجبكم الموضوع ده
العصفورة الاولى::::::::
كنت مرة قاعد فى حالى و سرحان و بكتب فى الشعر و بدندن بالالحان و جاتلى فى البلكونة عصفورة تعبانة و شكلها يعنى عطشانة مسكتها و قلت سبحان الله مالك كده هزلانة قالت اسكت سبنى فى حالى ده انا اللى جرى ما جرالى.ضحكت بصوت عالى و قلت وانتى كمان مالك مضايقة ليه؟؟؟ ردت و قالت اكل العيش مر. رديت عليها و انتى كمان شايلة هم لاكل العيش.ليه؟؟؟ رديت عليا و قالت انا اتعلمت و دخلت مدارس كنت فى ابتدائى بجرى و العب و برضه بذاكر ابويا يقولى ذاكرى و امى تقولى اقرى علشان تطلعى من الاوائل كنت صغيرة مش فاهمة حاجة قلتلهم طيب كل ده ليه؟؟؟ قالولى علشان لما تكبرى تبقى حاجة دكتورة مهندسة محامية و حتى مدرسة و المجال قدامك مفتوح ذاكرى يا عصفورة. فضلت أذاكر و اذاكر و ادخل دروس و ابويا يدفع فى الفلوس لحد ما دخلت اعدادى أملى بيكبر قدامى و شايفة الحياة بمبى وفضلت أذاكر و خدتها جد شوية ما انا خلاص سبت الابتدائية و اهلى فرحانين بيا و يقولولى يلا محامية فرحت انا بالكلمة دية و أذاكر و انجح و كمان مدرسينى يشكروا فيا يا هنايا مين قدى فى الدنيا دية و خدت الاعدادية و دخلت الثانوية . يا سلام حلمى بيتحقق شوية شوية و دخلت برضه دروس خصوصية فيزياء و رياضة و احياء حتى اللغة العربية أمااااااااال ما انا لازم اجيب مجموع الكلية الحمد لله السنة الاولى عدت بنجاح و التانية عدت و انا مرتاح والتالتة عرفت معنى الافراح .آه دخلت الكلية و أمى فرحت بيا. قالتلى معايا ولا تعبت من القصة دية قلتلها: لا انا معاكى كملى و بعد ما دخلتى الكلية و كلية ايه دية؟؟ قالتلى خلاص بقيت محامية انا فى كلية حقوق شفت الهنا بعنيا درست و اذاكر و اذاكر و انجح لحد ما نظرى ضعف من المذاكرة و السهر مش مهم ما خلاص حقق الحلم عدت اولى و عدت تانية و عدت تالتة و اخيرا بقيت فى السنة النهائية يااااااااااااااااااااااااااه أخيرا هخلص من القصة دية قصة كفاح المدارس و الكلية و هبقى محامية و خلصت رابعة بتقدير جيد جدا و اهو انا هبقى محامية و صحيت على صدمة جابت واطيا عاليا.
خير حصل ايه قوليلى. قالتلى صحيت على كابوس اسمه الواسطة و المحسوبية اصل ابن الوزير بيبقى وزير و ابن المدير بيبقى مدير و ابن الدكتور بيبقى دكتور طيب قولى ايه انا اسوى وسط الناس دية؟؟؟؟
قولتلها و تقديرك ومجهودك ؟؟؟؟ ردت و قالتلى : قالولى بليه و اشربى بيه ميه
قلتلها ليه مش اشتكيتى ؟
قالت الشكوى لغير الله مذلة
رديت : طيب و المسئوليين رأيهم ايه ؟
ردت و قالت بسخرية قالولى سوف ننظر فى القضية والحال ده بقالى 15 سنة و ما فيه شئ بايديا
قلتلها: ليه ما فتحتيش مكتب خاص قالتلى عارف لو ابويا وفر كل قرش صرفوا عليا كان زمانى بقيت رئيس جمهورية المدارس و الكلية ما سبتش فى بيتنا لقمة هنية ده غير مصاريف اخواتى و مصاريف الزوجية.
رديت أمال انتى دلوقتى شغالة ايه بشهادتك دية ؟
ضحكت و قالت انا ح يا الله شغالة عند بتاع فول و طعمية. ربنا يكفيك شر الكوسة و الواسطة و المحسوبية.

أتمنى ان تكون نالت اعجابكم وانتظرونا فى العصفورة الثانية
بقلم:
نسر الشرق

كنت قاعد لا بيا و لا عليا و دخلت عليا العصفورة الشقية و شكلها مبسوط شويةبتضحك ضحكات و ضحكات بس اللى هية.
ابتسمت و قلت خير اللهم اجعله خير جيتك دية وراها رزية. قالت لى: هوانا لازم أدخل و شايلة فى قلبى آهات انت مش سامع الضحكات ده انا جاية و هاحكى على البنات... قلتلها مالهم يا مؤذية اوعى تقولى حاجة وحشة على البنات.
قالت لى اسمع منى و احكم يا شاعر الآهات.
كنت طايرة فى السما و نزلت أكل من جنب نبات و لقيت حكايات و حكايات لقيت زينات مواعدة الواد شحات و متقابلين قال ايه فى جنينة الاسماك مع ان مفيش بينهم ارتباط بس اللى فهمته ان شحات بياكل بعقل زينات
واللى امر وادهى شفتوا اللى عملوه؟؟؟ رديت أنا:
شحات و زينات ضحكت وقالت: دول بس تفاهات انا بتكلم على البنات
عملو ايه؟؟؟ قوليلى.
قالت لى:نسيوا اللى فات و شغل العبايات و الملايات و طلعولنا فى حكاية البنطلونات.ضحكت أنا و قلت قوليلى يا جلابة المصايب هات و هات
مش مهم اللى فات خلينا فى الجايات شفت الواد بيقول البنت بحبك و من غيرك ما اعرفش أعيش مع ان فى جيبه مفيش حق رغيف العيش و مسكينة البت تصدق ما هى عيشة بقيت تزهق كله عايز يتجوز و بس .فى دنيا مفيهاش حد يحس و يا عينى على اللى بيحصل بتصدق اول ما يحلف و فيه اللى بيسلم نفسه من غير حتى ما تحسب.
توهتينى يا رويتر قصدك ايه بكلامك؟؟؟
بص يا شاعر المشاعر على عمايل البنات أنا مش قادر
على الموضة و الاسترتش و البادى اللى ما يسترش البنت عرفت المحزق و الضيق والاب ما بيحكمش.نازلة من بيتها عيقانة ماشية تتندغ فى اللبانة وتحسها ماشية سكرانة وهية مش لاقية الاعانة بقى بالذمة ده اسمه كلام يا اللى انتى سامعانا؟؟؟؟؟
رديت و قولت: ومين دى اللى سامعانا؟؟
قالت لى: دى واحدة من ضمن البنات.
أما الباقى أمر و أتعس شفت وائل علق بسنت و بيكلمها عن طريق النت.رديت انا وقلت:
لا عندك يا عصفورة الا النت ده كله فوايد ولا انتى بتخترعى خبر بايت؟
ضحكت العصفورة و قالت يا سيدى مش كل البنات نوعيات و نوعيات
سألتنى :انت زعلان؟؟؟
قلتلها من حال الانسان.
طيب نكمل كلام
قولت نكمل كلام بس بسلام و احترام.
ماشى يا شاعر الاوهام أما بسنت قابلت وائل وكل يوم بشوفوا عنها سائل وشوية شوية قلبت علاقة غرامية مع انه من اسوان وهية من المنوفية وعمره ما شافها الا عن طريق الكاميرابس مش الخفية. و سمع صوتها بالمايك و بسنت عاشت و لا تعرف وائل ما انت عارفه يا شاعر
وائل الواد اللى كل يوم يسكر و لا بيصلى ولا يستر بس بسنت تعرف منين ما هو بعيد عن العين ولا هتعرف اخلاقه منين مسكينة بسنت.
ومسكين وائل عارف ليه؟ قلت انا ليه قالت ما هو ما يعرفش بسنت ان سمعتها زى الزفت و وائل انضاف ضمن أجندتها.
فهمت يا شااااااااااااااااااااعر؟
فهمتى يا اللى انتى سامعانا؟؟؟
أما التالتة يا جماعة عاملة زى بتوع الاذاعة ما تبطلش نقل كلام من غير لا عيب ولا حرام وهيجى منين الاحترام؟طالما المستخبى كله بان.مبدأها بيع الشرف تعيش فى ترف وانسى الزمان تعيش فى حنان و اللبس يا عينى كله شفاف عشان تظهر كاملة الاوصاف و المغفل تعجبه الاوصاف و ينكب على وشه زى المقطاف.
يا شاعر انت معايا ولا........؟
ضحكت انا و قلت:انما الاعمال بالنيات
قالت لى: ما انا قلتلك نوعيات و نوعيات ومننساش فيه كتير محترمات انا بس بقول على انا بشوفوا ما يعجبناش
كملى شكلك هتودينا اللومان .
شفت اللى لابسة نقاب و غير العينين ما يبان ماشية فى الشارع كلها احترام قلت يا ناس الدنيا بخير ودى اكيد غير الغير اسمها زهراء اسمها يا ما احلاه دخلت شارع رايحة البيت و فجأة يظهر علاء تقلع زهراء النقاب و تقول الحمد لله محدش عرفنى يلا يا علاءقبل الوقت ما يروح نروح سينما نتفرج على فيلم يغذى الروح بتتدارى فى النقاب و واخداه ستار بالذمة مش حرام؟
واتارى النقاب طلع ستار ده حتى مفيش حجاب تصور يا شاعر بالذمة مش حاجة تحزن مش حاجة تعصب مش حاجة تزعل
والله انا تعبت من كتر المتاهات بس زى ما قولتلك يا شاعر البنات نوعيات و نوعيات و فيه كتير محترمات.آه تعبت يا انا.
فهمتى يا اللى انتى سامعانا؟؟؟؟؟؟
سالتنى العصفورة دماغك راحت فين؟؟؟
ولا أقلك على بنات الكليات
قلت: مالهم كمان؟؟؟
البنت أصلها صعيدية بتفرح لما تروح الكلية لسانها يتعوج فجأة و تبقى بحراوية كلمة كلمة قنا تبقى انا وعلى العمايل اللى بتحصل بكترة كانها كانت فى جرة و طلعت لبرة تقف مع ده شوية و قال ايه عايزة محاضرات الكلية و تقف مع التانى شويتين علشان بتسأل السكشن فينو تاخد رقم الموبيلات عشان يوم تسريب الامتحانات و عمايل كتيرة ما تتقالش لو قعدت أحكى فيها ما تخلصش.بالذمة كده انتى فرحانة؟
فهمتى ياللى انتى سامعانا؟؟؟؟؟
عصفورتى الحلوة:نعم يا شاعر
ممكن طلب.
اتفضل
انتى شفتى حاجة تانى غير اللى قلتيه؟
قالت ايوة انا هحكى على....... قلتلها: بلاش كفاية
خلاص براحتك بس شكلك عايز تقول كلام قول يا شاعر و انا هسمعك.
انا عايز أقول احترامى لكل البنات بس مش كل النوعيات البنات المحترمات البنات اللى ممكن تبقى أمهات و نصيحة بلاش شغل المكياجات اللى بتطمع الناس فيكم بلاش اللبس الشفاف اللى بيخلى كل حاجة تنشاف بلاش اللبس الضيق اللى بيخلى الشباب يدقق نداء بكل سلااااااااااااااااااااااااااااااااااااااااااااااام احنا مش عايزين غير الاحترام
وزى ما قلنا فى اللى فات البنات نوعيات و نوعيات.
بقلم/
نسر الشرق
أتمنى ان تنال اعجابكم و انتظرونى فى العصفورة الثالثة

جاتنى العصفورة مبسوطة و بتقولى : ازيك يا فنان يا شاعر
رديت و قلتلها: أهلا بعصفورتى الحلوة
ردت و قالت:وليه ما تقوليش يا فنانة ما احنا خلاص هنبقى زمايل
رديت : زمايل؟؟؟ يا زمن الهوايل و ازاى هنبقى زمايل يا فنانة؟
قالتلى: ما انا خلاص قررت أغنى و هسمعك مقطوعة من البومى
قولى يا فنانة و سمعينى
بدأت بنحنحة و قالت: احمم احمم
أنا نفسى أكل كباب باب باب باب باب ,حتى لو كان لحم كلاب لاب لاب لاب لاب, ولو الفلوس فى جيوبى مفيش مفيش مفيش مفيش مفيش ,هشرب برضه كمان حشيش حشيش حشيش حشيش حشيش ,عيشة تطهق عيشة تعل تعل تعل تعل تعل,الواحد قرف من كتر الذل الذل الذل الذل الذل.
آه ايه رأيك يا فنان أنفع أغنى بالألحان؟؟؟
رديت و قولت: زفت زفت زفت زفت
ضحكت و قالت: ليه بس يا فنان؟
قلتلها بالذمة دى كلمات تتغنى و لا لحن يتسمع و لا ده فن من اساسه
ردت و قالت:يعنى جات عندى ووقفت هو انا ما قلتلكش؟؟؟؟
رديت: قلتيلى ايه؟؟؟؟
كنت يا سيدى طايرة فى ذات النهار و سمعت مطرب بيغنى للحمار و كمان الشعب بيرقص على دى الاوتار ويا عينى ع الشباب و مستكتر عليا أغنى للكباب.
رديت :طيب ده مطرب من مليون
قالت:استنى بس و اسمع اللى اتقال نفس المطرب غنى للبرتقال يا سلام يا برتقال لو عرفت انه فى يوم اسمك هيبقى فى اغنية كنت زمانك ما تقعد مع الملوخية.
كنت مرة طايرة و لقيت صاحبى جعان قلت أساعده ما هو برضه غلبان و لقيت مطرب لابس شكل البغبغان بس لئيم و بيقولولوا شعبان عبد الرحيم اصله مكوجى و ده مش عيب بس يغنى ده أكبر عيب و اللى غايظنى و اللى فارسنى برضه الشعب بيسمع شعبان أنا أشك ان جيه مرض للودان يخليهم ما يميزوا بين عبدالحليم و شعبان.
قلتلها : يلا رزق الهبل على المجانين آه و بعدين؟؟
قالت: و الشباب الكيييييييييييييييف لازم يرقصوا على غنوة للحشييييييييييييييييش فغنى لهم واحد بدم خفيف و عامل نفسه الخواجة ينى و قالهم: انا شارب سيجارة بنى حاسس ان دماغى بتاكلنى.الا قولى يا فنان يعنى دماغه بتاكله؟؟؟؟؟
ضحكت أنا و رديت: والله الظاهر مخه كان جعان ماهو ده بعينه الجنان.كملى يا فنانة.
واللى أمر و أتعس واحد تانى بيستهبل و بيرمى العيب على صحابه و يقول كوكا كوكا وطبعا دى زى ما احنا عارفين شجرة الكوكا اللى بينتج منها الكوكايين ودى تعتبر دعاية يا فنان؟؟؟ وقال ايه ايه فى الكلمات لفوا له حاجة بنى اصله محشى بروح امه. مش عارف كلام يجنن و كلام يغيظ عرفت قد ايه انا محرومة. يرحم زمانك يا حليم على زمن سوما.
قلتلها:بس بيقولوا ده الشعبى بتاعهم؟
ردت و قالت: شعبى ؟ شعبى مين بلا أذية هم نسيوا أحمد عدوية الشعبى على حق
آه كملى و مضايقة من ايه تانى
قالت بصراحة معظم الاغانى مش عاجبانى.اسمع
غنوا ل على و غنوا ل ذكى مع انهم ما يفرقوش عن بعض نفس اللحن و نفس المعنى و فى النهاية طلع على و زكى مش محترمين الاتنين بيحدفوا بالليمون.
وكله ضاع و كله فى توهان من يوم ما طلعلنا شعبان البغبغان هو احنا ناقصين ابو نص لثان عوضنا ع الله فى الودان
ولا سعد الصغير ما تعرفوش بيغنى ولا بيقلد قرد صغير
ولا شعبان ولا ابنه ما هى خلاص بقيت وراثة مش فن .كله هباب و مستكتر عليا اغنى للكباب
والليثى و واللى غنى للشيشةو حمادة زرزة و أسماء كتير زى الكبة و آه علشان ما ننساش أشرف وهبة بالذمة مش أصوات يجيبوا الحصبة
جالى صمم فى الودان يا فنان من أغانى اساسها جنان الله يرحم الفن و المطرب اللى كنا نقول عليه فنان
رديت عليها بس الدنيا لسه بخير فى مطربين غير الغير

يا فنان لو عديتهم هتلاقيهم 20 من ضمن مليون مساطيل يبقى العيب فى مين؟؟؟؟؟
رديت : العيب فينا اللى بنسمع كلام و السلام بنرقص على مسخرة و فاكرينها ألحان بنرقص عل الحان الملحن مفيييييييييييييييييش الله يرحمك يا سيد درويش بنسمع أغانى مذمومة الله يرحمك يا سوما بندندن مع مغنى لئيم فين ايامك يا عبد الحليم صحيح بدون مجاملة ولا تمثيل راح زمن الفن الجميل عليك العوض يا حياة فين زمنك يا نجاة
ضحكت العصفورة: مش من حقى بقى أغنى طالما المهنة خلاص خلصت من الاحساس ما هو كلام بيتقال و خلاص يبقى مستكترها عليا أنا يا ابن الناس
رديت: وانتى ترضى لنفسك تبقى بهلوان عايش بلا وجدان كل همه السكر و السطلان.
قالت: طبعا لا
قلت :يبقى خلاص خلينا معاللى اتبقى من أغانى الاحساس المطربين اللى بيقولوا كلام موزون مش مطربين الليمون فهمتينى يا عصفورتى الحنون وكفاية صمم للودان ولا ايه يا جدعاااااااااااااااااااااااااااااااااااااااان؟؟؟؟؟؟ ؟؟؟؟؟
اتمنى ان يكون وصل قصدى واتمنى ان تنول اعجابكم
بقلم/ نسر الشرق
انتظرونا فى العصفورة الرابعة

جات العصفورة تبكى بمرار وكانت جاية فى وسط النهار وعنيها دى حمرة زى النار
قمت مفزوع وجريت عليها بصوت مسموع ناديت عليها مالك عصفورى جاى منهار و عنيك بتطق شرار.
ردت عليا و قالت: انت مش حاسس بغلو الاسعار و الناس يا عينى عيشتها مرار و اخوانا اللى بالك فيهم ايديهم فى المية مش زينا فى النار.
قلتلها: عندك حق يا عصفورة الناس نفسها بقت مكسورة من الاسعار و الدنيا اللى كل مالها بتولع نار
قالت: فين ايام التعريفة و المليم و القرش و الدينار و لما كان برخص التراب الخضار
قلتلها: والناس حالتهم ايه؟؟
قالت: كله حاله فى حال نفسه كله بيقول يلا نفسى العيشة بقيت مرار ولا حد قادر يشتكى والكل ابتدى ينهار و هيشتكوا لمين غير للمولى الستار.
سألتها: طيب و المسئوليين؟؟؟؟
ضحكت و قالت: ده شغل يجيب الكسوف و العار كلهم بيقولوا بنشجع الاستثمار و يلهو الناس لحد ما يموت الاحساس لكن موجود المنتقم الجبار ساتر الستر يا ستار.
عارف كمان حصل ايه؟؟؟
رديت حصل ايه؟؟؟
قالت: كيلو اللحمة بقى ب50 جنيه
يا ولاد الايه
شفت الغلب و المرار طيب و الموظف الغلبان اللى بينش عليه الدبان اللى مهيته يدوب ثمن الدخان او حتى ثمن فستان يعيش ازاى و ياكل لحمة ازاى مش ده شغل جنان
بلاش الموظف الغلبان طيب و الراجل اللى ع المعاش اللى عاش حياته قد ما عاش اللى معاشه يدوب يستر بيته بالذمة لو جاب اللحمة مش يتخرب بيته
بلاش طيب انتوا الشباب تتجوزوا ازاى لما كل حاجة بقيت نار مش بالذمة شغل يجيب العار؟؟؟
واللى أمر و اتعس مسئولييين النوم دايما فى نوم وهم مالهم و مال الاسعار مش نايممين مالين البطون تتحرق الناس و مسيرها تهدى العيون بالذمة مش حاسس نفسك مظلوم
أقول ايه ولا ايه لينا رب ندعى ليه
رديت و قولت: مش علشان غنى ولا فقير مش عشان صغير ولا كبير بقول يا ريت يكون عندنا ضمير يا ريت نرجع للمولى الستار المنتقم الجبار و ندعيله و نقول يا رب تنزل الاسعار و يا رب يحسوا بينا اللى بالى بالك و ينزاح عنهم الستار و كفاية عيشة مرار يا حليم يا ستار
سلااااااااااااااااااااااااااااااام عصفورتى وجبيلى تانى أخبار أنا فى الانتظار
بقلم/ نسر الشرق
سلسلة العصفورة قالت لى........انتطرونا فى العصفورة الخامسة

جات العصفورة حزينة و فى وشها لطشة سكينة و الدم منها بيشر لحد ما طرطش علينا
سألتها: مالك يا عصفورتى الحنينة؟؟
ردت و قالت: اللى اتعمل فى ام درمان يستحق انه يتعمل فينا
قلتلها: ايه حصل ايه و ايه اللى جرى؟؟
قالت: أحكى من الاول و لا اجيبلك من ورا
قلت: من الاول و اوعى فى الكلام تحورى
قالت: هتكلم على التعصب الكروى
اللى بيحصل فى الكورة والخناقات و الشبورة. و التشجيع بدون ريادة ده عمره ما كان رياضة
ده ممكن يكون حرب و استعمار أو حتى شغل فى ورشة نجار ومن اللى انا شفته اقول كتر خير الحمار
الضرب بالحجارة و المطاوى والشتايم ده ولا قعدة القهاوى اهلاوى بيسب زملكاوى و زملكاوى بيرزل على أهلاوى و اسماعيلاوى بيحقد على مصرواوى و...و ....و....بالذمة مش ده جنان. بالذمة مش نستحق اللى حصلنا فى أم درمان؟ و قال ايه بيقولوا الغلط ع السودان.
ولا لما يكون مباراة ذهاب الضيف بيحس انه هيلعب مع ذئاب واقرب مثل بيتهيألى لما لعب الاسماعيلى مع الاهلى شفت الاهلى لما كان ضيف الاسماعيلى كان زى رفيق حليش ولا الجمهور ابو دم خفيف شتايم و عصبية ما تتحكيش بقى هو ده اكرام الضيف ولا مش مهتمين يا اخوانا ده احنا كلنا مصريين.
ولا الحكام انا معاك يتثير الجنان بس اللاعب الغلبان ولا الجمهور الزهقان ما يمسكش أعصابه ليه يا اخوانا شوية ارادة دى مهما كان اسمها رياضة مش حرب و انتفاضة.
ولا النقاد الصحفيين اللى هم المفروض قدوة المصريين على الاعلام مسيطريين و طبعا بيهدوا النفوس ماهو كله بياخد فلوس و قصدى بتهدية النفوس مش المعنى الصحيح ده الواحد منهم بيقول تصريح يخلى الشعب النايم يصيح و تبدأمن تانى العصبية بتاع الاهلى مستحلف للزملكاوية و العكس بيحصل بس ده مثل انا بقولوا لحد يفتكر انا بقصد نادى بعينه بالذمة انت مش زهقان. بالذمة مش ليهم حق اللى عملوه فينا فى ام درمان؟
رايك ايه يا شاعر الارادة. بالذمة هية دى الرياضة؟
ولا انتم يا أعضاء النجوم بالذمة ينفع كده الهجوم؟
رديت عليها بعد شهيق: عصفورتى لا تعليق***
بس مستنى رأى النجوم و بقولهم ينفع الحال ده يدوم
ولا علشان مفهوم عن الرياضة غلطان ينفع يتقال نستاهل اللى اتعمل فينا فى أم درمان
أمال فين وحدة الاوطان؟؟؟؟؟
بقلم/ نسر الشرق
انتظرونى فى العصفورة السادسة

وبعد ما غابت يومين رجعت العصفورة تقولى : انت فين؟؟؟
قلتلها: أنا اللى فين.. ولا انتى اللى غايبة بقالك يومين.
قالت مش بروح أجيبلك أخبار.. آه انتو كده يا معشر البشر الصبر عندكم منهار
قلتلها: احنا صابرين و حامدين و شاكرين. المهم انتى جبتى حاجة حلوة و لا رجعتى بخفى حنين
قالت: أنا جاية و هتكلم على السواقين.
قلتلها : و تقصدى بمين من السواقين.
قالت: هتكلم على المهنة عموما
سواقين الملاكى بتوع مامى و بابى وسواقين الملاكى المحترمين
وسواقين الاجرة اللى طباعهم زى الطين و كمان الغلبانين
وسواقين النقل المجانين و كمان العاقلين
وسواقين اللى موتو سهل قصدى الموتوسيكل و ما أعتقدش ان فيهم عاقلين
رديت : حيللك حيلك توهتينى ولا عارف مالك. فى ايه؟
اسمع يا فنان اصل المهنة ما بقتش تتصان . دلوقت تلاقى الواد 9 سنين و أبوه العيقان مديله الملاكى يدور فى الشوارع بجنان يجرى و بس و معلى الكاسيت وباللى ماشيين مش بيحس ماشى يعاكس فى البنات و يتعايق فى الملفات اشى تلاتات و اشى خمسات و لما يقع فى الخطر و يدوس على انسان العايق يقول يا ريت اللى جرى ما كان يا ريت ما اديت الملاكى لابنى التلفان و بوليس و اقسام و فى الاخر المرحوم كان غلطان . مش عندى حق المهنة مش بتتصان؟؟
وتلاقى الشاب برضه كمان سايق الملاكى من غير رخصة ولا شادد حزام الامان ماشى يبصص للنسوان والمصيبة والكارثة لما البيه يعمل حادثة تبقى فضايح و جرسة من محاكم لاقسام و برضه المرحوم كان غلطان مش بالذمة المهنة ما بقتش تتصان؟؟
نيجى لسواقين الاجرة اللى من الفجر بيعملوا أزمة كلكسات وازعاج على ايه على مفيش أنا معاك ده أكل عيش بس مش بالطريقة اللى تخلى العقل يطيش.
على الخط السريع تلاقيه لا همه بنى آدمين ولا كمين ولا لا مؤاخذة حمار ولا حتى رادار سرعة جنونية ما تقوليش همه يحصل نقلة تانية و مش مهم أرواح الناس مش عارف ان الدنيا فانية و لا حتى عنده احساس و لما يجى المحظور و يتقلب الدكتور و تروح أرواح الناس الحادثة تقيد ضد مجهول.عاجبك الحال التلفان. مش بالذمة المهنة ما بقتش تتصان؟؟
وخناقات سواقين الاجرة على زبون أو حتى نقلة التانى تلاقيه طلع مطوة و فى ثانية تتقلب مجزرة. بقى بالذمة ده كلام يجرى ولا حتى كلام انسان فهمان. مش بالذمة المهنة ما بقتش تتصان؟؟؟
ولا سواقيين النقل و اللى بيجرى لا هممهم مرور ولا حتى سوق عبور أهم حاجة الوصول للمكان فى اسرع زمان و طالما الدماغ مزبطة و المزاج عال حتى لو الحالة محبطة و فى رقبته كوم عيال مش مهم الطريق و لا مهم سلامته المهم يلحق يوصل نقلته ولا همه قواعد ولا بنى آدمين على الطريق المهم يعاند ومش مهم التدقيق. والله شغل جنان. مش بالذمة المهنة ما بقتش تتصان؟؟؟؟؟
وكله كوم و صاروخ العصر اللى سموه الموتوسيكل أى حد وأى سن تلاقيه مشى بيه بجنان و كأن الاخ راكب حصان ده هوس و شيطان مش وسيلة لخدمة الانسان و يا سلام ع الكوارث اللى بتحصل من الموتوسيكل و الموت اللى بيجى فى لحظة توهان أصل اللى سايق عامل نفسه عايق و بيستعرض قدام الناس لا عنده دم ولا احساس على اى حاجة بيدوس و بسرعة تفوق الوصف لحد ما يقع المحظور و يقول يا ريت اللى جرى ما كان. مش بالذمة المهنة ما بقتش تتصان؟؟؟
رديت عليها وقلت: العيب مش عليهم العيب فى أهاليهم اللى بتسمح للولاد اللى هم اساسا مش قد المسئولية يسوقوا العربية راح فين العقل والله حاجة تجن و لو مخفش على ابنه طيب يخاف على العربية اللى المحروس سايقها بدون رخصة بلاش العربية يخاف ابنه ليجيبله رزية و الله احترت من تفكير الناس دية
وعشان ما ننساش فيه سواقين محترمين عاقلين اللى بيحسبوها صح بالعقل مش عايششين نايميين بس لو حسبناهم و شفناهم بالعيون هيطلعوا 100 من مليون والله شغل يخل العقل فى توهان
مش بالذمة المهنة ما بقتش تتصان؟؟؟؟
وحاجات كتير ع السواقين و ع الملاكى و ع النق و ع الاجرة و لو قعدت أحكى من هنا لبكرة مش هلخص اللى بيجرى و الله شغل يودى اللومان. مش بالذمة المهنة ما بقتش تتصان؟؟؟؟
بقلم / نسر الشرق
انتظرونا فى العصفورة السابعة

موضوعات أكثر من رائعة يا استاذ / نسر
احيى قلمك المبدع فى طرح السلبيات الموجودة فى المجتمع بهذا الشكل

ايه الكلام الجاااااااااامد ده احنا عايزين كل الناس تقرا الموضوعات الجميله ديه ونعرف رايهم

بجد تسلم ايدك

العصفورة قالت لى... Icon_cheers

هى بجد سلبيات منتشرة فى مجتمعنا ده ولازم تتغير بس السؤال تتغير ازاى؟
رسالة خاصة لنسر الشرق انت بتدخل كزائر بس وانا عارف ده لان بشوف اسمك لو عندك سلبيات تانى او العصفورة قالتلك على حاجة تانى يا ريت ما تحرمناش من انك تقولها و تعرفنا بيها باسلوبك الحلو ده ولو حتى انك تشارك فى الموضوع ده بس
وشكرا لحضرتك

موضوع جميييييييل
شكرررررررار

حلو الموضوع يا ريت تكمله

شكرا يا صقر انت و عمرو ونودا و اوعدكم بتقديم المزيد من العصافير

شكرا لك و نحن ننتظر المزيد

اخيرا رجعت كان فيه ايه بس عايزين نشووووووووفك فى باقى الموضوعات يا نسر وتكمل كده معاناااااااااا

وبعد ما غابت أيام رجعت العصفورة و شكلها تعبانة
قلتلها: اهلا يا دكتورة كنتى فين عن عيونى خفيانة
قالت لى: بس عشان انا زهقانة
والحمد لله انى مش انسانة
قلتلها: و جرى ايه عشان بتقولى احمد لله انك مش انسانة
قالت لى: انتوا معشر البشر فيكم الناس الخوانة
انا باختصار جاية أحكيلك على الخيانة
ومن انواع الخيانة انا شفت ياما
قلتلها: و شفتى ايه من انواع الخيانة
احكيلى يا فنانة
قالت لى: اسمع الحكاية دية و قولى بالذمة مش عندى حق لما بقول الحمد لله انى مش انسانة
شفت اتنين حبيب و حبيبته بيرسموا مستقبلهم و بيتوعدوا على الامانة
سافر الحبيب و ساب حبيبته عشان يوفر لحب عمره السعادة و الهنا و كافح بكل امانة
وهو فى غربته ما بيفكرش غير فى سعادة اللى كان فاكرها غلبانة
يشقى و يتعب و يكافح و يكد لحد ما قال لنفسه كده كفايانا
وهو فى سفره يسمع من صحابه ان حبيبته مع غيره فى الحب غرقانة
و لما عاد المسكين من سفره هو مش مصدق ما سمعه و واجهها بما سمعه قالت له: ازاى بتصدق كلام ناس جبانة
دول عايزين يفرقوا بينى و بينك و انا طول عمرى ما حبيت غيرك ونفسى تكون الناس دى دلوقتى سمعانا
صدقها المسكين و عاش الوهم و قال لنفسه حبيبتك على وعدك وانسى كلام الناس الخوانة
وفى يوم من ذات الايام وهو معدى بالصدفة يلاقى حبيبته فى حضن غيره فى الحب هيمانة
وقف مذهول مش مصدق نفسه .. وفى باله كل اللى فات وكل اللى كان بينه و بين الندلة الجبانة
وقع صاحبنا من طوله و لما فاق لقى نفسه لا قادر يتكلم و لا قادر يتحرك فى سرير مستشفى مرمى محتاج الاعانة
عرفت يا صاحبى ايه نتيجة الخيانة
رديت و قولت: استر علينا يا من ترانا
قالت لى: دى قصة من انواع الخيانة
قلتلها: و شفتى ايه كمان يا فنانة
قالت: شفت اتنين اصحاب تقدر تقول اخوات ما بيفارقوش بعض الا وقت النوم
لا بيهمهم مشاغل الحياة ولا حتى الهموم
يفتح عليهم ربنا باب رزق و يبقوا من اسياد القوم
وكل يوم فى تقدم و المال بيزيد يوم بعد يوم
لكن الشيطان الملعون اللى ما بيسيب المرتاح مرتاح ولا المهموم مهموم
دخل ما بينهم و سول لواحد فيهم يخلص من صاحبه ويبقى لوحده فوق الغيوم
مشى المسكين بعربيته و مش عارف ايه اللى القدر مخبيه من صاحب خاين مذموم
وعدى على كمين و يتوقف للتفتيش و كانت المفاجأة العربية ملغمة حشيش بالكوم
واتقبض على المسكين و فى النيابة لما عرف المقلب من صديقه الحميم
طب ساكت المسكين و مات فى غمضة عين من لعبة حقيرة من انسان ملعون
و من غدر الصحاب فى عالمنا احنا الطيور الحمد لله ربنا كفانا
بالذمة مش احمد لله انى مش انسانة
عرفت يا صاحبى ايه نتيجة الخيانة
رديت و قلت: اللهم اجرنا فى بلايانا
كملى يا فنانة
قالت: شفت كمان حكايتين زى بعض وادة لزوج و التانية لزوجة
الاولى قصة زوجة لزوجها مخلصة قايمة تمام بشغل البيت ومحافظة على بيتها تمام
بيجى البيه بيلاقى الاكل جاهز و الهدوم مكوية كمان
والعيال و همومهم شايلاها المسكينة من غير ما تقوله تلت التلاتة كام
لكن صاحبنا الجبان كل يوم مع واحدة شكل من النسوان
والمسكينة مراته فى البيت شقيانة و الحيل مهدود و مش مستنية منه حتى كلمة احسان
وفى يوم من الايام تعب واحد من العيال و طبعا الاستاذ مش فى البيت وكان مع واحدة من اياهم فى المنكر غرقان
خدت المسكينة ولدها و جرى على الدكتور اللى يبعد عن بيتها بس دلوها عليه الجيران
وهية طالعة العمارة شافت أبو العيال طالع من شقة سكران
ولما شافت المنظر اغمى عليها فى الحال و بعد ما فاقت و بصت للندل و بصت للعيال و بعد سرحان
طلبت الطلاق و دموعها على الخد بتجرى زى الفيضان
وخدت العيال و طلقها الجبان
صانت كرامتها بس للأسف العيال بقيوا ايتام
ربنا يتولاهم برحمته و بالاعانة
عرفت يا صاحبى نتيجة الخيانة
أما القصة التانية لراجل غلبان من الشغل للبيت عشان يدوب يطلع بعد الضهر شغله التانى عشان يوفر للهانم عيشة مرتاحة
بيجى حيله مهدود وينام و الهانم فى غيابه شرفه ما تصون وبعيشة الحرام هية مرتاحة
هو يكد و يتعب و يشتغل وهية ما مخلياه يشوف طعم الراحة
طلبات عمال على بطال مع ان بيت ابوها مفيش حتى تفاحة
جايبة له الكلام فى منطقته حتى الجيران سموها الرداحة
الغلبان فى شغله تعبان و الهانم تخرج بلبس خليع و تحط البرفانات الفواحة
وفى يوم بعته مديره لبيته يجيب اوراق مهمة لشركة السياحة
وهو طالع من البيت يلاقى المدام طالعة من بيت العزاب اللى قصاد بيت مدير شركة السياحة
ما اتمالكش اعصابه و جرى عليه و قتلها فى وسط الساحة
واتسجن المسكين و قضى احلى سنين عمره فى الزنزانة
عرفت يا صاحبى ايه نتيجة الخيانة
و كل اللى انا قولته يدوب جزء من الخيانة
بالذمة مش عندى حق لما قلت الحمد لله انى مش انسانة
قالت لى: مالك ساكت ليه انت تهت فى بداية الطريق
رديت و قولت:عصفورتى لا تعليق
بقلم/نسر الشرق
أتمنى ان تكون نالت اعجابكم و انتظرونى فى العصفورة الثامنة

تسلم ايدك و بجد شئ ملفت للنظر جدا فى أيامنا دى كثرة الخيانة
أحييك و منتظرين العصفورة التامنة

حلوووووووووووووووووه اوووى يا نسر
تسلم ايدك

شكرا مروركم

هايلة يا نسر
اللهم اكفنا شر الخيانة

اللهم أمييييييييييييييييين
شكرا مرورك

العصفورة الثامنة****** راحت كرامة المصريين

جات العصفورة طايرة و شكلها زعلان وراكبها ميت شيطان
قلتلها: مالك يا وشك جايب ألوان؟
قال لى: بالذمة مش مكسوفين من نفسكم يا معشر الانسان
رديت: خير اللهم اجعله خير حصل ايه فى معشر الانسان
رديت عليا و قالت: ان مش مصرى ولا ده مجرد كلام؟
قلت: طبعا مصرى تمام التمام
قالت لى : طيب الحق علشان المصرى الوحيد فى هذا الزمان اللى كرامته بتتهان و محدش بيرد الاعتبار لهذا الانسان
رديت : فى ايه يا عصفورة احنا هنخبط فى الكلام طيب اتلمى يا اما ترحلى فى سلام
قالت: وليه زعلان يعنى هزك ده الكلام
طيب ما ترحوا دوروا على حقكم المسلوب الضيعان
ولا فالحين تتشطروا على الضعاف من معشر الطير و الحيوان
قلتلها: ممكن تسكتى و تفهمينى ايه حصل علشان تقولى كلام ما لوش اصلا عنوان
قالت لى: فى الاول انضربتم فى السودان فى ام درمان فاكر ولا ده برده من تأليفى يا انسان
قلتلها: فاكر اللى حصل فى ام درمان
قالت لى: و فضلتوا تقولوا اخوة و عروبة و دى لحظة شيطان وراح حقكم واطلعتم انتم السبب العدوان
لا مسئوليين ردوا الحقوق ولا شعب وقف وقفة انسان
فضلتوا تلالو و بس مصر ام الدنيا و احنا ايد واحدة و كله كلام فى الهوا يا فنان
كله راح و اتنسى و كأن اللى جرى ما كان
سكت و بعد كده قولت: فى دى عندك حق كله راح و اتنسى و كأن اللى جرى ما كان
قالت لى: و بعد كده راح فريق منكم ليبيا و اضرب والليبين لا همهم اخوة ولا عرب نسيوا انها كورة مش عدوان و حرب
وفين المسئوليين كلهم نايميين و مين يجيب كرامة المصريين ؟
اسكت يا فنان خليها على الله المعين
رديت و قولت وانا كلى كسوف : انت يا طير بتفهم اكتر من البنى آدميين
آه و بعدين برده ما قولتليش ليه جاية زعلانة وليه الناس مهمومين
قالت لى: على كرامة المصريين اللى بقيت فى التراب و سمعتها بقيت زى الطين
رديت و قولت: فهمت قصدك و فهمت كلامك على الانسان
انتى تقصدى على اللى حصل فى لبنان؟
رديت و قالت: عليك نور يا فنان ما هو انت بكل شئ دارى و سمعان
بقى بالذمة ده اسمه كلام خطف و قتل لانسان و التشوييه بيه فى ميدان عام و يلفوا بيه الحوارى و البلدان
و بحجة انه قتل 4 مرة واحدة طيب كانوا فين الجيران؟
طيب بلاش ده بيقولك طعن الجدة 23 طعنة والجد شوه ملامحه كمان بالذمة ده كلام له معنى؟
وطعن طفلة 7 طعنات و التانية عذبها لحد ما ماتت كل ده حصل و ما حد سمعان؟
بقى بالذمة ده اسمه كلام
طيب يعنى محدش قدر منهم يهرب أو يستغيث او حد منهم جرى و فتح الباب و يقول الحق يا شاويش
كلام ما يدخلش الدماغ صحيح
وحتى لو هو مذنب و غلطان ازاى يتخطف من مسئوليين الحماية و الأمان فى لبنان؟
داخل مخك يا صاحبى ده الكلام
ازاى يتخطف من المستشفى و يتاخد قدام الخلق فين الامن و الامان؟
ازاى يسمحولهم بعد ما قتلوا بالتمثيل بجثة انسان؟
طيب فين جمعية حقوق الانسان ولا ده بس كلام؟
والسؤال يا فنان بيعيد نفسه بعد يدوب شهر أو شهرين
عملتوا ايه ولا هتعملوا ايه انتم يا مصريين؟
هيعملوا المسئوليين؟
هيستنوا تحقيقات و كلام فاضى ما لوش اساس و المشكلة تخلص و خلاص
وزى ما بدأت انتهيت و كأنك يا أبو زيد ما غزيت
لو عايزيين ياخدوا الحقوق كانوا خدوها من زمان وكانوا رد اعتبار المصريين فى كل مكان
كانوا خدوها من اول مشكلة فى السودان. كانوا خدوها من ساعة ما ابتدى القتل ع الحدود للعساكر المصريين فى طابا و قال ايه يقولك عن طريق الغلط. ما كانوش استنوا اللى حصل ده فى لبنان
والله بشوف كلام يحزن على المصريين فى مواقع النت العربية فى لبنان و العراق و حتى فلسطين
بالذمة مش كرامة المصريين بقيت تحت التراب فى الطين؟
السؤال بقى يا فنان: لحد امتى هتفضل تضيع كرامة المصرى الانسان؟
رديت و قولت: والله ما اعرف ايه آخرة الظلم و العنف و العدوان على كرامتنا فى كل مكان
لا املك سوى ان أقول حسبى الله و نعم الوكيل فى كل ظالم آثم و جبان
طارت العصفورة قدامى من قبل ما أخلص كلامى
بس سؤالى دلوقت ليكم انتم
ايه رايكم فى ضياع حقوقنا قدام العالم و مسئولينا ساكتين؟
لحد امتى هتفضل تضيع كرامة المصريين؟
بقلم/ نسر الشرق
اتمنى ان تنال اعجابكم و انتظرونى فى العصفورة التاسعة

انا مش عارف اقولك ايه على الكلام ده بجد والله لازم ينزل فى جريده او مكان كويس
بجد تحفه

بالذمة مش كرامة المصريين بقيت تحت التراب فى الطين؟
السؤال بقى يا فنان: لحد امتى هتفضل تضيع كرامة المصرى الانسان؟

شكرا يا رامى على كلامك الجميل ده
وشكرا مرورك يا نودا