اوعى تسمع كلام اللى يقول لك بطل سجاااااااااير ده يبقى واد توتو وميعرفش فوايد التدخين !
التدخين يضفى عليك مظهر الرجوله :
اذا كنت حاسس انك عيل ومنظرك ميجبش راجل ابدا ، امسك سيجاره وانفخ فى وش الخلق . هيفتكروك راجل على طول
التدخين ببطء وبتركيز يعطى إيحاء بأهميتك وعمق تفكيرك:
إذا كانو الناس مستهيفين شخصيتك ومانتش مالى عنيهم ولع سيجاره ، واسحب كل نفس منها ببطء جدا وانفخه لفوق بعنطزه ، الناس هيفتكرو انك عقليه علميه معمليه فذه ! وحيبقى شكلك ولا لاكى لوك فى زمانه !
تدخين السجاير علاج ممتاز لبطء التفكير:
إذا اتزنقت وزكائك مش ساعفك بتصرف سريع ولع سيجاره! على ما تولع وتشد وتنفخ ، بيكون ربنا فرجها وحتت الدهنه اللى جوه الجمجمه طلعت رد ! ومحدش يلحق يحس انك موحوس!
التدخين يجمع البنات الحلوه حوليك :
ويحوطو سريرك كمان ! ويقعدو يتغزلو فيك ويقولو لبعض : ياسلام لو كل العيانين اللى بيدخلو لنا قسم الامراض الصدريه شباب حلوين كده !
التدخين يحافظ على صحتك من الامراض المعديه:
طبعا ، ما الدبان نفسه مش هيهوب ناحيتك وهيقرف من ريحة بقك !
ا:لتدخين يحافظ على مظهرك ويحميك من مشاكل الشيخوخه
ما هو هيموتك بدرى قبل ما تلحق تشيب او تصلع!!
السيجاره يمكن ان تنقذ مستقبلك :
اسرق الخازنه وارمى السجاره على الارض قبل ما تخرج ، ان الله حليم ستار !!
ملحوظه: استعمل سجاير غير اللى انت متعود عليها ، عشان عقب السيجاره مايجبشى رجلك !
التدخين يجعلك شخصا متميزا :
طبعا ، ماهو دونا عن مخاليق ربنا انت الوحيد اللى بتطلع الغازات ...... من بقك !
السيجاره تجعل منك رجلا ذو بصمه لاتمحى من ذاكرة الناس :
اى حته تدخلها، الناس مش ممكن ينسو انك شرفتها ، وحتى اللى دخلو بعد خروجك هيعرفو انك كنت موجود . من الريحه......... !
السيجاره تكسبك الاحترام :
اول ما تدخل حته الناس تقوم واقفه على حيلها ! ويروحو جرى يفتحوا الشبابيك
التدخين يضفى عليك سيما الوقار والهدوء :
لو انت بدخن من زمان وحاولت تمشى بسرعه او تجرى وتنط السلم زى العيال ، حتنهج ونفسك يتكرش وهتبقى حالتك تصعب على الكافر !
السيجاره بتهدى اعصابك لما تكون متغاظ :
هو صحيح فيه حجات كتير ممكن تهدى الاعصاب زى الينسون او الكركديه ، بس شكلك بالسجاره بيحسس الناس انك فعلا شايط وبتطلع دخان !
السيجاره تساعدك على تجاوز المحن والفرفشه :
دايما فى الافلام العربى لما البطل بيحصل له مصيبه ، يطلع عالكباريه ، السيجاره فى ايد والكاس فى ايد وفى اخر الفلم يتجوز الرقاصه !
السجائر تقوم سلوكك وتحميك من الانزلاق فى الرزيله :
ما انت لو بس حاولت تقرب من واحده حاتقرف من ريحتك وتهشك فورااااا !
التدخين يحسن علاقتك بزوجتك :
انت بتفقد حساسة التزوق تدريجيا ، فمش هتاخد بالك من طعم العك اللى مراتك بتطبخه ، وتوفر على نفسك البهدله لو اتريقت على طبيخها !
لو كنتى بنت ، السيجاره بتكتر المعجبين بيكى :
منظر السيجاره فى ايد البنت بيوحى انها بنت مدرن ومتحرره وايزى ، فيتلم حوليها كل الشباب اللى بيدورو على بنت ايزى!
وبعد كل الفوائد دى وعايزينى ابطل سجاير دا بعدكم ...قال ابطل سجاير قال....... حد هيجى معايا نشرب حجرين معسل
هاهاهاهاهاهاهاهاهاهاهاهاهاهاها
للعلم منقول من على الكومبيوتر ولا اذكر من اين حفظته على الجهاز
الإثنين ديسمبر 15, 2014 8:51 pm من طرف حاتم عبدالسلام
