الاسطورة الحية

اظن لو سألنا ا اي حد الهرم الاكبر ده عباره عن ايه؟ هيرد بكل بساطه و تلقائية و يقول انه مقبرة للملك العظيم خوفو.
ماشي انا مش هعترض علي الرد ده حاليا, بس اظن في شوية معلومات بسيطه عن الهرم الاكبر ممكن يكون في منكم ميعرفهاش,
زي مثلا ان الاربع جهات اللي في الهرم كل جهة بتشير لجهة من الجهات الاصلية, يعني الشمال و الجنوب و الشرق و الغرب,مش بس كده, لا دي بتشير للشمال المغناطيسي كمان اللي في فرق بينه و بين الشمال الجغرافي حوالي اربع درجات,تفتكروا صدفه؟؟يمكن!!!
و زي كمان ان قمة الهرم بتشير رأسا و بدقة شديدة لنجم الشمال,و نجم الشمال ده للي ميعرفش زي ماهو واضح من اسمه انه بيشير دايما الي جهة الشمال,تفتكروا صدفه؟؟يمكن!!!
و زي كمان ان في غرفة في الثلث الاول من الهرم اكتشفوا فيها طعام صالح للأكل لحد عصرنا ده, بالمناسبه الأكل ده كان عباره عن قمح و عسل,بل اكتر من كده كمان ان من خواص الغرفة دي ان لو حطينا فيها موس تلم و سيبناه فترة هنبص نلاقيه استعاد حدته تاني و رجع زي الاول,و ده لان السبب اللي بيخلي الموس يتلم اصلا هو ان جزيئاته بتتحرك فوق بعضها, فلما بيتحط في الغرفة دي الجزيئات بترجع لمكانها تاني,تفتكروا صدفة؟؟يمكن!!!
و زي كمان ان ارتفاع الهرم الاكبر هو 149متر,و احب انبهكم ان المسافه بين الارض و الشمس هي 149 متر مضروبة في مليار,اظن شايفين الشبه بين الاثنين,تفتكروا صدفة؟؟يمكن!!!
و زي كمان ان خط العرض اللي بيعدي علي الهرم الاكبر بيقسم الكره الارضية نصفين متساويين تماما ــ 50% و 50% ــ في نسبة الارض و نسبة المياه,تفتكروا دي كمان صدفة؟؟يمكن!!!
و زي كمان ان مساحة الهرم مقسومة علي ضعف طوله بتساوي 3.14 , و للي مخدش باله 3.14 دي هي النسبة الثابتة اللي بيستخدموها في حساب المثلثات, اللي بيرمز ليها بالرمز (ط),تفتكروا صدفة؟؟يمكن!!!
و زي كمان ان الغرفه السفلية في الهرم لما اكتشفوها لقوها فارغة تماما و العلماء اجمعوا علي انها متسرقتش , يعني هي كانت فاضيه اصلا , طب عملوها ليه؟!!!
ناهيكم بقي عن الدقة المذهلة في بنائه و ان نسبة الغلط بين اطوال اضلاعه الاربعة لا تتعدي نسبة 0.001 %!!
و كل اللي قلتهولك ده مجرد اللي انا اعرفه, لان في كمية مهولة من النسب المثيرهة للدهشة ما بين الاهرم الاكبر و الكره الارضية,بل ان في كتاب مشهور اسمه(ميراثنا في الهرم الاكبر) للكاتب (تشارلز بيازي سميث) بيذكر فيه النسب و العلاقات دي!!
بعد بقي كل الكلام اللي فات ده هرجع و اسأل تاني نفس السؤال,الهرم الاكبر ده عبارة عن ايه؟
اظن دلوقتي بقي الاجابة هتتغير او علي الاقل هتفكروا كويس اوي قبل ما تجاوبوا,صح؟
بس في نهاية الكلام هيفضل الهرم الاكبر ده من الالغاز اللي بتحير البشريه و اللي اظن انها هتفضل تحيرها لمدة لا يعلمها الا الله سبحانه و تعالي, زي حقيقة قارة اطلانتس و زي سر مثلث برمودا و زي علاقة الرقم سبعة بحياتنا.
و هيتميز الهرم الاكبر عن كل الاساطير التانيه بانه هو الوحيد .....الاسطورة الحية.